Tuesday, 23 January 2018

Obasanjo ya ce Buhari ya hakura da mulki a 2019

Tsohon Shugaban Najeriya Olusegun Obasanjo ya shawarci Shugaba Muhammadu Buhari da cewa ya kamata ya hakura da neman ta-zarce a shekarar 2019, saboda yawan shekaru da yanayin lafiyarsa.


A wata budaddiyar wasika da Obasanjo ya fitar wacce BBC ta samu kwafi, tsohon shugaban kasar ya ce mulkin Najeriya al'amari ne da yake bukatar mutum mai cikakkiyar lafiya wanda kuma shekarunsa ba su ja ba, saboda aiki ne ba dare ba rana.

Obasanjo ya kara da cewa Shugaba Buhari yana bukatar lokacin da zai zauna ya yi tunani, ya murmure ya kuma huta da kyau, ta yadda daga baya zai iya shiga sahun tsofaffin shugabannin Najeriya da suke da gogewa da hikima da basirar da za su dinga bayar da shawarwari don ciyar da kasar gaba.

A wasikar ya kuma tabo yadda rikicin makiyaya da manoma yake daukar wani salo daban, yake kuma kara muni ba tare da gwamnatin tarayya ta dauki wani mataki na magance matsalar ba..

"Kuma abun takaicin shi ne yadda bayan kwana guda da kashe kimanin mutum 73 a jihar Benue sai ga shi wasu gwamnoni da ko sakon jaje ba su aika ba sun goyi bayan Shugaba Buhari ya sake neman tsaywa takara a 2019.

"Bai kamata su yi hakan a wannan lokaci ba, bai kamata a mayar da batun rikicin manoma da makiyaya na zarge-zargen juna ba. Dole ne gwamnati ta jagoranci kawo mafita kan hakan," in ji Obasanjo.

Za mu kawo muku ci gaban bayanan tsohon shugaban kasar zuwa jimawa kadan.
bbchausa.

No comments:

Post a Comment