Tuesday, 17 July 2018

Me ke tsakanin shugaban Faransa da shugabar Croatia?

Mutane da dama daga sassa daban-daban na duniya na ta yin tsokaci kan ko wanne dalili ne ya sa Shugabar kasar Croatia Kolinda Grabar-Kitarović ta dinga kasancewa kusa da Shugaban faransa Emmaneul Macron, a yayin wasan karshe na gasar cin kofin duniya, duk kuwa da cewa matar Mista Macron na wajen.


Wasu da dama sun yi ta wallafa hotunan Mista Macron tare da Kolinda Grabar-Kitarović, inda a wurare da dama aka nuna su ko dai suna rungume da juna ko kuma suna sumbatar juna.

Hakan ya sa wasu ma'abota shafukan sada zumunta suka dinga zargin cewa ko dai da wani abu a tsakanin shugabannin biyu ne, yayin da wasu kuma suka dinga jajantawa matar shugaban kasar Faransan.

Shi ma dai mijin shugabar ta Croatia ya halarci wasan. Kawo yanzu babu wani martani daga shugabannin biyu ko kuma gwamnatocinsu.

Faransa ce ta doke Croatia da ci 4-2 inda ta lashe gasar, wacce aka fafata a kasar Rasha.


@parislima ya rubuta cewa: "Emmanuel Macron ya bai wa shugabar kasar Croatia wata dankareriyar sumba yayin da matarsa Brigitte Macron ke ta faman rawa."

Shi ma wani mai shafi @nahdhi89 ya rubuta cewa: "Ba zan maki fatan komai ba sai na alkhairi Brigitte Macron."
"Ina taya Faransa murnar samun nasara amma gaskiya na ga Brigitte Macron ba ta cikin farin ciki ...@ Ga Emmanuel Macron da shugabar Croatia Kolinda Grabar-Kitarović," a cewar @SeidGoro.
Wannan sakon na sama kuwa cewa yake: "Me yake faruwa ne da shugaban Faransa da takwararsa ta Croatia? Sai taba juna da sumbatar juna suke yi."

A farkon fara wasan dai Shugaba Macron da Shugabar Croatia Kolinda Grabar-Kitarović da na Rasha Vladimir Putin da shugaban hukumar FIFA da Sarkin Qatar na zaune ne daga gaba-gaba, waje na musamman da aka ware musu.

Amma daga bisani sai Sarkin Qatar Tameem bin Hammad Al Thani ya tashi ya nemi matar Mista Macron da ta koma wajensa kusa da mijinta ta zauna, shi kuma ya koma bayansu inda take zaune.

Wasu ma'abota shafukan sada zumuntar dai sun yi ta wadannan kalamai ne suna mai alakanta sabuwar alakar da aka gani tsakanin Mista Macron da shugabar Croatia da yawan shekarun matarsa Brigitte Macron mai shekara 65, yayin da shi kuma yake da 45.

Ita kuwa shugabar Croatia tana da shekara 50 ne kuma ita ma tare da mijinta ta je kallon kwallon amma ba a nuna ta kusa da shi ba, kuma ba a gansu tare a hotuna ba sosai kamar yadda aka yi ta ganinta da shugaban Faransa.

Sai dai ga dukkan alamu tsananin farin ciki da nishadin da shugabannin biyu ke ciki ne ya sa suka dinga kasancewa da juna, tare da runguma ko sumbatar juna a duk lokacin da bangare daya ya zura kwallo.





No comments:

Post a Comment