Wednesday, 1 August 2018

Kwankwaso da Ganduje sun yi haduwar farko tun bayan ficewar Kwankwaso daga APC

A wani yanayi na bambarakwai, an yi wata haduwar bazata tsakanin Gwamnan jihar Kano, Abdullahi Umar Ganduje, da tsohon gwamnan jihar, Sanata Rabiu Musa Kwankwaso a jihar Kaduna, amma fa babau wanda yace ma wani uffan.

Tsofaffin aminan sun hadu ne a yayin jana’izar uwargidar Janar Aliyu Muhammad Gusau, ranar Talata 31 ga watan Yuli, wanda aka binneta a wata makabarta dake garin Kaduna, sai dai duk da cewa sun hadu gab da gab a makabartar, amma basu yi magana da juna ba.

Wannan haduwa itace haduwar farko da jigogin siyasar jihar Kano suka yi tun bayan ficewar Sanata Rabiu Musa Kwankwaso dsaga jam’iyyar APC, inda ya hada kai da tsohon gwamnan jihar, Ibrahim Shekarau a jam’iyyar PDP don kawar da Ganduje a zabe mai zuwa.

Marigayiya Hajiya Binta Gusau ta rasu ne a ranar Juma’a 27 ga watan Yuli a wani Asibtin kasar Jamus bayan ta yi fama da doguwar jinya, hakan yasa aka sa aka samu jinkirin dawo da gawarta Najeriya, har sai ranar Talata.

Daga cikin wadanda suka halarci jana’izar akwai gwamnan jihar Kaduna, Nasir El-Rufai, gwamnan Sakkwato, Aminu Waziri Tambuwal, shugaban majalisar dattawa, Sanata Bukola Saraki, mataimakin gwamnan jihar Zamfara, Ibrahim Wakkala, Gwamnan Neja, Abubakar Sani Bello da dai sauransu.

No comments:

Post a Comment