Wednesday, 17 October 2018

An Hargitse A Majalisa Yayin Da Saraki Ya Hana Akpabio Yin Magana

A yau Laraba ne daru ya barke a majalisar Dattawa tsakanin sanatocin jam’iyyar APC da na PDP bayan shugaban majalisar ya ki amincewa Sanata Godswil Akpabio da yi magana a zauren majalisar.


Saraki ya nemi Akpabio da ya koma wajen zaman sa kafin ya bashi damar fadin abin da ya ke so ya fadi ko kuma ya hakura da abinda ya ke so ya fadi.

“Sanata ka ke ko tsohon Shugaban Marasa Rinjaye, kai ma ka san bai yiwuwa na bar ka ka yi magana daga inda ka ke, saboda ba wurin zaman ka ba ne. Idan ka na so ka yi magana, to ka koma wurin zaman ka ka zauna.” Inji Saraki.

A dalilin haka majalisa ta yamuste inda kowa ya ja daga.

Kafin haka shugaban masu rinjaye na majalisar Ahmed Lawan ya nemi Saraki ya amince wa Akpabio da ya yi magana a zauren majalisar amma hakan bai yiwu ba.

“Shin don ya zabi ya zauna can inda ya ke a yanzu sai me? Ka bar shi ya yi zaman sa mana. Ai can inda ya ke babu makirfo shi ya sa. Bai kamata wani da ciwon kai mu da sha masa kwarorin Panadol ba. Don ana ganin bai fi sauran watanni shida ko bakwai mu kammala zangon mu ba, ai ya kamata a rika yin abin da ke daidai.” Inji Sanata Ahmed Lawan.

Dukkan kokarin da Shugaban Majalisa Saraki ya yi domin kwantar da hargitsin bai yi nasara ba.

Domin sai da ta kai wasu sanatoci na tashi daga kan kujerun su, su na tsallakawa su na nuna juna da yatsa su da wadanda su ke cacar baki da juna.


Idan ba a manta ba Akpabio, wanda shi ne tsohon gwamnan jihar Akwa Ibom, ya garzaya Landan inda Shugaba Muhammadu Buhari ke zaman hutu ya je ya yi mubayi’ar komawa jam’iyyar APC daga PDP.

Bayan dawowar sa Najeriya kuma, Akpabio ya ziyarci jagoran APC, Bola Ahmed Tinubu.

Ya shiga APC dauke da shirgin nauyin zargin harkallar danne wasu biliyoyin kudade.

Hawan Buhari mulki ke da wuya a cikin 2015, Akpabio na daya daga cikin wadanda yaki da cin hanci da wawurar kudade ya fara yi wa dirar mikiya.
Premiumtimeshausa.

No comments:

Post a Comment