Friday, 15 March 2019

An kashe mutum 49 a masallaci a New Zealand

Kimanin mutum 50 ne aka kashe, 20 kuma suka ji rauni bayan wani hari da aka kai wasu masallatai biyu a birnin Christchurch da ke kasar New Zealand.


Firai ministan Australia Scott Morrison ya bayyana maharin, wanda yake da takardun na Australia, da " wani dan ta'adda."

'Yan sanda sun ce sun kama mutumin da ake zargi da kai hari kuma za su gurfanar da shi a gaban kotu ranar Asabar da safe.

Hakazalika ana tsare da wasu mutum biyu, kuma an kama wasu makamai, a cewar Kwamishinan 'Yan sanda Mike Bush.


Sai dai 'yan sandan sun ce daya daga cikin mutanen da suke da hannun, sun fahimci cewa ba shi da hannu a harin, kuma jami'ansu suna ci gaba da binciken sauran mutum biyun.

Wannan harin shi ne mafi muni da aka taba kai wa kasar New Zealand.

Abin da aka sani kawo yanzu?
An fara kai wa masallacin Al Noor mosque hari ne wanda yake tsakiyar birnin Christchurch. Wasu da suka shaida al'amarin sun ce sun rika gudu don neman tsira da rayuwarsu, a daidai lokacin da suka ga wasu mutane suna fitowa daga cikin ginin jina-jina.

An sa mutanen da ke masallaci na biyu da ke wajen birnin Linwood ficewa daga cikinsa. Kuma 'yan sanda sun kwanshe wani abin fa da aka makala a jikin wata mota, in ji Mista Mike.

Mahukunta sun umarce a rufe duka masallatan da ke birnin har sai abin da hali ya yi.

A lokacin da yake magana da manema labarai, Mista Bush ya ce 'yan sanda suna aiki don ganin sun kama sauran mutanen da ake zargi da hannu a harin. .

Ya ce an gano wasu makamai da wurin da harbe-harben biyu suka faru.

An rika kai mutanen da suka jikkata asibitin birnin inda aka tsaurara matakan tsaro.

Rana mafi muni' a New Zealand: An bada shawarar rufe masallatai a kasar har sai yanda hali yayi.

A kalla mutum 49 ne aka kashe kuma sama da 20 suka samu raunuka masu muni bayan da aka kai hari a masallatai biyu a Christchurch da ke New Zealand.

An kama mutum hudu da ake zargi suna da hannu a harin- an bayyana daya daga cikinsu dan kasar Ostireliya a matsayin mai tsattsauran ra'ayin ta'addanci.

Shugabanni da mutanen duniya sun yi Allah-wadai da harin inda gwamnatin kasar ta sha alwashin hukunta maharan.

Gwamnatin New Zealand ta shawarci musulmai da su kulle masallatansu har sai baba ta gani.
BBChausa.

No comments:

Post a Comment