Monday, 10 June 2019

Dalilin tsame hannun mu daga shari’ar zambar naira biliyan 25 ta Sanata Goje>>EFCC

Hukumar EFCC ta bayyana cewa Ofishin Antoni Janar, kuma Ministan Shari’a na da karfin ikon da doka ta ba shi na karbe shari’a daga hannun EFCC ya maida ta a karkashin ofishin sa.


Kakakin Yada Labarai na EFCC, Tony Orilade ne ya bayyana haka a yau Lahadi a Abuja.

Orilade ya yi wannan raddi ne dangane da maganganun da ake ta yayatawa a kan yadda EFCC ta bayyana wa Babbar Kotun Tarayya sanarwar janye hannu daga shari’ar da ta gurfanar da Sanata Danjuma Goje.

EFCC ta maka Sanata Goje Kotu, shekaru takwas baya a na tafka shari’ar zargin sa da wawure naira biliyan 25 daga baitilmalin jihar Gombe a lokacin da ya yi gwamnan jihar tsawon shekaru takwas.

“Dalili kawai shi ne saboda Ofishin Antoni Janar na Tarayya ya karbe shari’ar daga ofishin mu, ya maida ta ofishin sa.

“Kuma dokar kasar nan ta bai wa wannan ofishi ikon karbe shari’a ko bincike daga ofishin EFCC zuwa ofishin ta.

“Wannan shi ne abin da ya faru.” Orilade ya karanto dokar Najeriya, Sashe na 174(1a) na Kundin Dokokin 1999, wanda ya bai wa ofishin Antoni Janar wannan karfin iko.
Premiumtimeshausa.



No comments:

Post a Comment