fbpx
Thursday, September 23
Shadow

Najeriya Ta Karbi Jiragen Yakin A29 Super Tucano Daga Amurka

A hukumance, Amurka ta mikawa Najeriya manyan jiragen yakin nan na zami wato A29 Super Tucano a wani dan kwarya-kwaryan biki da aka yi a sansanin sojojin saman Najeriya dake filin jirgin saman birnin Abuja.

Da yake jawabi a wajen mikawa Najeriya jiragen yakin, babban kwamandan dakarun saman Amurka dake kula da Turai da Afirka Janaral Jeff Harrigian ya ce mika wadannan jirage na nuni da irin kyakkyawar alakar aiki tare dake tsakanin Amurka da Najeriya.

 

Wani bangare na wannan alakar shi ne Amurka za ta horas da dakarun Najeriya batun mutunta ‘yancin bil’adama, ana sa ran wadannan jiragen yaki na zamani za su taka rawa wajen tunkarar aika-aikar ‘yan ta’adda.

Jiragen yakin na Super Tucano wadanda aka yi masu kyakkyawan tsarin sadarwa da sojojin kasa da sojojin ruwa, Amurka ta kuma hado da kayayyakin gyaransu na tsawon shekaru ko da za a bukaci hakan sannan za ta sa hannu wajen kara inganta wuraren ajiyar jiragen daka sansanin jiragen saman mayakan Najeriya dake Ka’inji.

Kimanin Dalar Amurka milyan dari biyar ne Najeriya ta kashe wajen sayowadannan jirage kudade mafi yawa da wata kasa a Nahiyar Afirka ta Kudu da hamadar Sahara ta taba kashewa wajen samar da jiragen yakin.

Babban kwamandan dakarun saman Amurka dake kula da Turai da Afirkan ya ce ba ko tantama wadannan jirage zasu taimaka wajen fatattakar ‘yan ta’adda musamman ganin jiragen na dauke da makaman da in an harbasu basa kuskurewa.

 

Ministan tsaron Najeriya da babban hafsan tsaron Najeriya ne suka karbi jiragen yakin a madadin gwamnatin kasar. Kimanin matuka jiragen sojin saman Najeriya sittin da ukune Amurka ta horas wadanda zasu sarrafa wadannan jirage samfurin A 29 Super Tucano.

Yanzu dai abin jira a gani shi ne irin tasirin da wadannan jirage za su yi wajen samar da tsaro a kasar.

Dan sauke manhajar hutudole a wayoyin ku. Sai a bi wannan link din na kasa:

Leave a Reply

Your email address will not be published. Required fields are marked *